Matthew 23

Afarisiyi Aba Bwi

1Yesu wa gna azayezhi, ɓedo wa bara yi, 2“Fye ɓagye ngye a Yahudawayi a tukoda, ɓedo na Farisiyi zhin Musa nu, ngye shi ɓa ɓe na wyidnayi mwa begye. 3Ko bmiya lo fya vi ɓa-ɓo nɓa da, ama fye to vi ɓo nɓa zhin m, ntu ge ɓa ta zhin ɓo ɓa gna fye ge fye zhin m.

4“Ɓa gna fye ge fye zhin aɓo ɓa dnaɓo na zhin ba ɓahin ta tumwi ge ɓa zhin n ɓa m. 5Nya ɓa zhin vinya ɓa zhin ge agye nu. Ɓa zhan ɓo gye aza gyi-gyi-yi, ɓai shi a takarda aduwa nya n na ayoyi kafi, ɓai ɓe atnu-tnu-je ɓopa nya yi kpe. 6Ɓa zhin ɓa ye ɓa sase kpe nabye n na nyagyi, ba, ɓedo na saseba manayi na duwa-nyakun. 7A zhin a da ɓa shi a yazhi ɓa, ai sa ɓa mi n zokwo, ai yi ɓa ge ‘Male’ Zadnagmayi! 8Fye to ye ge a yi fye ce, lo num! Ntu ge Shekwoyi gmanyi nu zhin fye Male, efye vinya zhin gmanyi nu n fya zaje yi. 9Fyei to yi zaho-zahoi nanyi ye ge, ‘Dada m,’ ntu ge Shekwoyi nwo tu she nyi, owo gmanyi nu na ɓa yi wo lo nu.

10“Ai to yi fye ge, ‘Dagayi m,’ ntu ge efye Dagayi bwasun gmanyi nu, wato Masihu.

11“N fya gba fyehin, fyei zhin aza bauta, fye ɓa ze aza adnagmayi. Eza nwo ye wa ze za-dnagmai vinya, wola ze fyenu. 12Aza nɓa gye ge ɓa zhin aza adnagmai nu, aɓa gba ɓa, ama aza nɓa gba ɓahin, aɓa la ɓa tu.

13– 14“Aiya nfya ba, Afarisiyi, n fya kunnu tukoda yi. Akoce-dnai. Fye taye ge aza je lo Shekwoyi bemin, fyei ta lo fyehin m. Fya zhan ɓo gya za gyi-gyi-yi, fyei zhin aduwa n mwa kpa, zhi na zokwo fyei kun anyigbayi ya nɓa puwa. Kai akocednayi! 15E, ai ya n fya ba akocednayi. Ntu ge fye zhin fya zan-zan nkpai, fyei zan abui-yei shin, esa fye la bwa, fya je zhin wa ze anapyi ɓi.

16“Abyeda awyebuayi! Aiya nfya ba. Ntu ge efye wyidna ge, eza nwa si nyasi n Shekwoyi nyakun yi, ko to zhin ɓoho nun, fye ɓa mi fya bma ko ya; ama n ʼza si nyasi n zinariya yi n ko nyi n Shekwoyi nyakun nyi, kwo zhin ɓo yako nu. 17Awyebuayi amamada. Kni do yi nu du loʼa, Zinariya ko aduwa-nyakun nɓa nu zhin zinariya koi ze gyi-gyi-yi nyiʼa? 18Fya je gna, nyasi n bagadi yi, aɓa mi a bma ko ya, ama n na si nyasi n nyaga yi ko zhin ɓekpakalayi nu. 19Wyebuayi. Kni do yi nu du lo a, nya na ga tu n bagadi nyi ko bagadi n ko nu zhin nya ga kwa ze gyi-gyi-yi nyiʼa? 20Esa fye si nyasi n bagadi yi, fye si nyasi nkwoi nu du n nyayi n ko tu ko. 21Esa fye si nyasi n aduwanyakun yi fye si nu n ko yi ɓedo n Shekwoyi nwo sase dna n ko nyi. 22Esa fye si nyasi n she yi, fye si nu n Shekwoyi Shikpegye yi ɓedo n Shekwoyi n wohin tukwo.

23“E, ayya n fye aba, Afarisiyi, ɓedo akunnu tukodayi-akoce-dnayi. Fye gna ge akun awoyi du na nya aɓi-ɓiyi anu nfwa, ama to fya gye fye anuwan n anya a dnagmayi m, ɓemanayi-zhin n sun-sungyeyi n gaiciya yi. E, fye ɓa gna a kun awoyi, ama ko to bmiya fya fa aɓo a dnagmayi zhin ɓo nu m. 24Abyeda awyebuayi. Fye kun bizuko ya fyei mi lakumi.

25“Ayya fye aba, Afarisiyi ɓedo akunnu tukodayi-akoce-dnayi, fye zhan ebue n bmi ama fya fa emi n cegyei. 26Afarisiyi awyebuayi! Fye ya ebue zhan n mi ntu ge ebue vinya kwa ze gyi-gyiyi.

27“Aya n fye aba, Afarisiyi ɓedo akunnu tukodayi! Fye wu gye avingo nu, n zhin aba zhin-zhin yi n bmi ama nmi nunuyi lo n aza sukun yi n anya bodoyi. 28Fye zhin atna fya wu ge fye zhin aza gyi-gyiyi nu, ama efye abugba nunu yi lo n laifi n cegye doho-dohoi.

29– 30“E, aya n fye aba, Afarisiyi, akunnu tukodayi-akoci-dnayi! Fye mi anya shi ntu anabi ɓepa ɓo n fye adada ɓo wu nyi, fyei kpe amamayi n a Shekwoyi aza avingo nɓa ɓo wu nyi fyei gna, yi nu ɓo gna yi nyi nsayi yi to ɓo ɓa zhin ɓo n eyi adada ɓo zhin nyi m.

31“Shi fye da lo nu nyi, fye wu fyehin nu ge fye zhin aza nukwoyi aɓi nu. 32Fyehin fye vi ɓa apita bwi nu, fya zhin ɓenukoy i ngye ɓa. 33Awa! Agma ɓi! Fye ɓa po owa jahannama nya n wuna?

34“Nɓa tnu fye anabiyi, n aɓeyekpeyi, fye ɓa wu azaho kpe n zundu, azadoho fya lu ɓa n abwokun ɓai knapoya fi n aduwa nyakun, fye ga azaho wahala n azhi gbo-gbo. 35Ntu ge Shekwoyi aza ami ɓa tu n fye n na ɓo wu nyi, tunyi n Habila ɓefyece zhinyi, har kwa ɓe Zakariya Barakiya nugun, nfye ɓo wu wo dna aduwa nyakun nyi. 36E, owaye vinya ko ɓo ɓe tu aza tuko n cala ye nu.

37“O Urushelima, Urushelima, ezhi yako n ko wu oha ɓi, koi she aza akuta n Shekwoyi tnu ko n cei nyi, abwa kniyi nu n mi ye ma ye ho aɓi zhi ngye shi pise zhin kwa ye ko aɓi fi abwase, ama to ho ye m. 38Nsayi a la ho puwa fa gniho nagusayi. 39Ma gna ho, ho ta je mi wye gyem, ‘sai esa nho ku shiri zhin ntu ge ha go eza n Shekwoyi wa tnu ga ho nyi.’ ”